محمد طه القدال: أغنية الرواويس ..

حليوة ٥ يونيو ٢٠١٩ م
الطلقة المشت في صدرُه زي اَهة
مشت بى غادي تحت الروح

 

شعر: محمد طه القدال

 

حليوة ٥ يونيو ٢٠١٩ م

الطلقة المشت في صدرُه زي اَهة
مشت بى غادي تحت الروح
مشلهتة من رحيقُه الفاح
ومن صبة ثبات الجوف.
ما شفتوا الرصاص هضرب؟
صباح الغدر والبهتان؟
هداك العسكري الرداح..
ما شايفنوا كاتل الروح .. كتَل روحوا؟
ومن بعد الكَتِل يا خيبة قام كضب؟
فلا برهان
بعد ما اتجلبط البرهان ..
بريحة الدم.
ودم الدم،
وزعزعة الدبابير بالكضبة تلمع فالصو
هِن لا هيبة
لا فوق الكتِف ترتاح.
مَرَقَت طلقة المطلوق
وركََّت فوق وطن ممهول
بيأبى يروح
نبَت صفَق الشهيد عزاً ..
قلانا قلي
وملانا ملي
وتاوق فوق عنا المجروح
وشالنوا البنات علمين
علم يمسك قلوبهن من رفيف الخوف
وتاني .. رفيفو هبّة ناس
على باب النصُر واقفين
ينادوا عليك ..
عليك يا طلقة المطلوق
قروشِك من بني سلمان
وريشِك من بني نهيان
وديشِك من بني حمدان
وبكره على العلينا .. نروق
ولا رأس العمالة يروق
وهم عارفين
منو الشتّربِك الأخلاق
وسمح القول
وسمح الناس
وسمح الدين.

وهُم شايفين
منو الصادربِك الغنوات
ولمات النفَق بي فوق.
عـلَي يا طلقة المطلوق
حنرسُمبِك
ملامح ناس
يترِّسوا في مسيرات الهدير تامّين
شُفّع يُفَّعاً شايلين تهاليل العدِل ميزان
ودوس كيزان
وتسقط بس
وشابات للسلام شَرَعن
نواصيهن قصاد الدم
وشباناً يغطوا الشم
يشيلوا الهم
تفرتقوا روق .. يجيبهم روق
عـلَيْ يا طلقة المطلوق
حننحتبِك رواويسنا اليغنوا مع الصباح للقيف
يشدوا على سروج النيل
يقودوا الطوف .. يساند الطوف
يختوا الزوق
بدال العوق
بدل زولاً فرد واحد
بلا ذمة
وبلا طايوق.

نقلا عن صفحة الأستاذ محمد طه القدال على الفيس بوك